www.pizzocalabro.it di Giuseppe Pagnotta

ORLANDO ACCETTA

SCRITTORE, POETA E GIORNALISTA

'I 'mbarcàti

Jàngu m'appàri 'u mari mendri 'u guardu

arrocculàrsi a cendu cavallùni

affacciàtu di subbra a 'stu "Spundùni".

Nìgghja assimìgghja quandu fragha 'nderra,

sbattèndu supr"ê scògghji cu potenza.

Scindi ccà ssutta comu 'na mundagna

e 'a gendi pari voli mu si mangia.

Su' tutti dind"ê casi pe' pagùra

accartocciàti pe' pregari a Dio.

Quandu 'a natura forti si scatìna

no ng'esti nùju chi la po' teniri...

senza pietà a tutti fa suffriri

e si ndi frica puru d"i preghèri.

Di 'nderra guardu chistu mari 'ngratu

mendri mi st'arrizzàndu tuttu 'u pilu,

e cu grandi rispettu e cumbrenziòni

penzu a cu' esti 'mbarcatu supr"ê navi.

Pòvari gendi sugnu 'i navicandi,

fora di casa pe' 'nu tozzu 'i pani.

O navicandi ammenzu chissu mari!,

a vui penzàmu cu 'nu grandi affettu,

mendri lu cori forti sbatti 'n pettu,

pregandu mu tornati sani e sarbi.

Vita tremenda stati vui facendu,

gugghjùta di perìculi e d'affanni.

*

arrocculàrsi = che si rotola

"Spundùni" = caratteristica balconata di Pizzo, da cui, nelle belle giornate, si può ammirare uno stupendo panorama con la "pippata" dello Stromboli.

assimìgghja = rassomiglia

fragha 'nderra =  caratteristico rumore del mare sulla spiaggia quando è in tempesta

accartocciàti = rannicchiati su se stessi e legati a catena in atto d'amore per gli assenti.